狠爆激光脫毛6大中伏位

你有無試過上美容或者脫毛中心俾人sell到走唔到?你有無試過上去但你唔敢帶信用卡淨係帶張八達通?你又有無試過做療程前sales會講到天花龍鳳,結果做完一啲效果都無,仲話因為你嘅情況比較差,要加多少少嘢嚟做?我相信呢啲情況每個女人都經歷過,但大家依然甘願繼續做白老鼠試唔同嘅公司,原因得一個:因為係女人都貪靚,同埋心口有個勇字! 免費試做,試下囉,到時唔買你吹咩?388 做脫毛?梗係試啦,咁平!點知最後Look咗幾皮,慘絕人寰。
 
 
我自己都試過唔少脫毛公司,基本上再無任何美容廣告可以呃到我,而我身邊既朋友我提醒得多,亦都無再中伏了。脫毛圈嘅是是非非,同埋啲公司嘅內幕,聽聽埋埋都唔少,集合埋希望以下嘅分享會幫到大家,join脫毛或者美容療程前起碼知清楚有咩事將會發生,唔洗一味得個驚字!
 
 
 
95%客人中伏的6大陷阱
 
 
1.         免費試做只做一半
喺我踏足脫毛呢行之前,其實都曾經被『免費試做』呢四個字昆過,結果上到去脫唇毛位只係幫我試做一半,咁即係擺明要你即場join,如果唔係你就一邊有毛一邊無毛咁走啦。而且大部份激光脫毛公司一般都只係問幾句客人皮膚狀況就同你開波做脫毛,連你有冇食緊藥或者有無曬過太陽搽過果酸都費事問多句,總之務求你快啲攞張咭出黎就Bingo!我個人認為,肯長氣問多句嘅脫毛公司,先係良知。
 
點解咁講?事關有個Friend試過食緊啲美白Supplement,上到M填完份水蛇春咁長嘅問卷後,個Sales竟然話佢不適合做激光脫毛,因為佢食緊嘅Supplement會令皮膚容易對光敏感,有機會burn,朋友嬲爆,話晒專程上去唔比做treatment只係幫佢做一下果個懶勁嘅Pro-test一怒之下就走咗去另一間有免費試做的公司做一次免費treatment,心諗個Pro-test有幾巴閉呢,根本無幫我脫到毛。
 
上到去,對方的治療師無話她不可以做,結果做完療程之後,皮膚真係出晒紅點,好彩過兩三日紅點自己散去,沒有留印,不過都樣衰左幾日。其實每個人的皮膚有無對光學敏感,真係連自己都未必知!為左貪小便宜去試做,分分鐘睇醫生睇到窮,得不償失。脫毛同醫學美容一樣,鬼死咁多試做同平嘢,個人經驗話我知,皮膚嘅嘢,一定要搵大公司,係可能貴啲,但係保障好好多。
 
 
 
 
2.      難以忍受既痛楚
10間有9間脫毛公司都話自己係無痛脫毛,但其實『無痛』唔係得個講字就得,因為激光脫毛始終都係有熱力,用熱能量穿過皮膚再破壞毛囊,而唔同嘅公司會有不同技術去做冷凍降低痛楚。
 
最傳統就係敷冰啦,呢個做法都成十幾廿年,應該冇乜甩漏。但係時代變遷,宜家大家都唔會再用Nokia 8810 一樣,敷冰浪費時間又辛苦之餘,脫毛效果又會被打折扣,脫啲大部位好似全手全腿咁就真係慘,諗都諗到自己會有幾凍啦。再講,都未脫到31其實隻手腳都已經唔再凍,所以多數會痛到標眼水。另外仲有風機,做療程嘅時候會有D風喺你皮膚上面吹下吹下,但風就始終凍極有限,呢種技術已經好Out,所以而家只有啲下游脫毛公司會用。
 
跟住就係好具爭議性嘅冷凍劑降溫喇(M記用緊),首先,市面上唔係好多脫毛公司有,連龍頭D記都無。原理係脫毛嘅時候,部機會自動噴出一浸叫嘅冷凍劑去保護皮膚表面,打一下出一下,據講冷凍劑有成-20 度咁凍,所以理論上係最唔痛同保護得最好。
 
但係話分兩頭,有啲用緊傳統冷凍方法嘅脫毛公司會話冷凍劑係化學嘢,個人認為化學嘢唔一定有問題,面膜都係化學嘢,護膚品都係化學嘢,激光本身都係人研發出嚟嘅科學嘢,咁唔代表係差嘅。不過要小心睇清楚間脫毛公司係咪用緊原廠儀器出品,因為有啲細啲嘅脫毛公司會偷雞,就好似BOTOX都有人用假貨。原廠出嘅冷凍劑一定攞晒啲國際性安全認證,大家都會好放心。另外就係究竟有無用足冷凍劑份量嘞,用唔足,會保護唔夠同埋痛,呢個都係有啲公司嘅偷雞位,大家要注意。
 
 
3.    約十世都約唔到做療程
好多脫毛公司都鍾意用低價黎打動人,咩$388underarm呀咁,引君入甕,你上到去脫完一次之後,如果唔買 full treatment 就唔駛旨意可以約到第二次,永世都同你講係full左,想脫到就唯有閒日請假唔好返工咁去脫;一係就每次再Sell 你買多啲買多啲,所以去脫毛或者美容公司買或者試療程之前,一定要上網睇下有無負面評論,始終紙包唔住火,一CheckCheck到。
 
 

 

 

 
4.    隱藏式收費
喺廣告見到平價脫毛係好吸引,但其實用腦諗下都知收你幾百蚊價錢,連鋪租&人工都cover唔到啦,我聽過妹妹講,有公司做到好似廉航咁,真係脫毛前嘅毛髮清理呀,事後嘅舒緩保濕Gel都逐樣同你計錢。仲有嘅係所謂『海鮮價』,呢個係好普遍嘅現象,尤其是當你訓咗係度做療程嘅時候,個治療師兼Sales會不斷游說你買呢樣買嗰樣,又話可以響面價度私下打個折畀你,計下計下連自己都迷晒,最後買咗乜嘢都唔清楚,正所謂一頸血就是咁樣黎!最慘係個治療師兼Sales走左之後,間公司唔認數,話公司唔會咁比折! 所以,精明嘅消費者,要搵啲名碼實價嘅脫毛或者美容公司先好上去,咁先可以唔會失預算。
 
5.    脫極仲有毛
彩光脫毛係唔能夠做到徹底脫毛效果,呢樣我都唔想花口水再講喇,如果仲有響廣告見到話永久嘅,騙人的,可以不理!最可怕的是,有些提供逐次收費嘅脫毛公司,其實係靜雞雞較細啲激光度數,等你打極都仲有毛出,到最後就係不停咁畀錢佢賺賺賺。
 
6.    出事無人理
美容脫毛醫療事故成日都有,但係女人都係唔會學精,仲係要幫襯啲古靈精怪嘅公司,或者連上網Check下都慳返,結果最後出事四圍申訴,可惜已經投訴無門。當然了,收得平的脫毛美容公司,又點會響條數度預啲保障畀你呢?388 脫毛,988 100 HIFU,真係會蝕死,萬一你出事,梗係會話唔關佢事,叫你自己睇醫生,而大部分的客人都屬於膽小,情願息事寧人,最後不了了之,啲公司贏晒!所以上得去平價脫毛公司,就預咗有上述情況。而其實喺Market上有良心嘅,或者比到多啲保障客人嘅公司,真係廖廖可數,M有自己醫生跟,有事唔使自己挖荷包。
 
 
 
總括一句,平嘢唔係一定唔好,但係多數有古惑;大公司係貴啲,但係勝在有保障;科技一定係越新越好,唔通個世界會返轉頭?免費試做表面係So 咗,但係最後極可能輸凸。脫毛美容都係為靚,何必慳果啲啲呢?

 

 

 
 
 
推薦文章
 

 

 

 

 

 

 

 

 

 
arrow
arrow

    Connielai148 發表在 痞客邦 留言(0) 人氣()